2020 年 5 月 3 日

糖宮甜品專門店 Dessert Palace

雖然食得糖多會令人肥又會加速衰老
但係如果好食嘅話… 肥咪肥老咪老囉唔理得咁多(全放棄狀態)

黑糖水信玄餅
自己跟住recipe整都唔會難食得去邊嘅滑嘟嘟水信玄餅
呢度食都唔會差得去邊啦~

椰皇燉蛋白
呢間嘢日以繼夜夜以繼日又再日以繼夜夜以繼日咁批椰皇
冇計啦鬼叫佢哋整嘅椰皇系都好食咩
唔起勢批邊做得切呀?
呢款係最最最standard嘅熱椰皇燉蛋白
椰味香奶味濃蛋白夠滑冇任何嘢可以挑剔

焦糖椰皇燉蛋白
椰皇燉蛋白凍食版本
一揭個椰蓋以為自己叫錯咗椰皇crème brûlée
食落去又以為人哋整咗個脆糖落蛋白度
統統唔係!只係照字面嘅有脆焦糖面嘅椰皇燉蛋白
脆糖面加落凍咗嘅燉蛋白甜度啱啱好
(因為凍嘅甜品一樣糖分但甜度會減少)
凍食嘅蛋白感覺creamy啲(3.6牛奶唔係流料)
有啲似crème brûlée但少咗蛋味多咗椰味咁

榴槤爺爺
繼續開椰皇啦!
椰皇燉蛋白底加榴槤肉小丸子仲有球榴槤雪糕
滑、漿、韌、爽一次有齊
奶凍無得輸再配無敵嘅榴槤…
太幸福喇呢個組合(大心)

開得椰皇多當然會有好多椰水
鍾意就嗌佢啦,一次過清甜消暑解渴嘛

榴槤雪花冰
講開榴槤,就唔少得呢兜榴槤雪花冰
榴槤味濃到震!仲要加舊榴槤肉喎
又有滑捋捋水晶同勁Q彈嘅小丸子加埋脆卜卜粟米片
食呢兜嘢真係好開心呀喂~

菠多野結冰
冰品仲有呢個原個菠蘿冰
冰裡面有粒粒鮮菠蘿
隔離兜椰汁白涼粉又有原片鮮菠蘿
足料到爆燈呢!

楊枝甘露雪花冰
椰奶芒果汁 x 芒果雪花冰 x 芒果粒 x 柚子
咪就係超凍版嘅楊枝甘露囉呵呵(廢話真係好廢囉)

芒果拿破侖
鍾意芒果;又鍾意酥皮
食呢個拿破侖就啱晒
脹卜卜嘅酥皮即叫即整四方puff咁樣唔塌皮
吉士蛋味香芒果又夠甜
因為叫先整,就唔會好似傳統嗰啲咁做夾層
但都唔會影響佢嘅美味啊!

榴槤酥皮卷
熱辣辣即叫即焗嘅薄酥皮榴槤卷
個皮好薄,一咬即離開了卻散落四周
裡面啲熱榴槤爆出(熱燙注意!)
熱還熱,趁熱食先最爆香
怕熱就食啖雪糕解熱啦

肉桂蘋果香蕉酥皮卷
濃味唔一定係水果本身嘅
香料有時都會做主角啊
就咁水果做餡會太濕
所以裡面有件蛋糕「吸濕」
酥皮都係薄脆款
就咁配雲尼拿雪糕味道簡單做得好就已經攞滿分

梳乎厘
係啦,份量比例啱timing夠準
用心做就會好食
絕對值得花時間等

朱古力心太軟 伴兩球雪糕thx
間嘢係有唔少傳統甜品食
包括中式糖水糖不甩芋圓同西式嘅

嗱!個朱古力會流㗎~
當然又係叫先至整要等嘅
畢竟要襯最新鮮食嗰陣最美味

喂呀… 究竟仲要嚟呢度食到幾多次啫?!
咁鬼好味搞到得閒就嚟啊啊啊啊啊…