2017 年 10 月 6 日

[食道鉄道北海道] Day5: 旭川 → 稚內

哇哇哇!個台風18号打打打到嚟喇
今朝去到函館呀道南嗰邊
風呀大雨呀有啲水浸咁
旭川都密雲有雨
一朝早就落車站改車飛
由晏晝一點半改做朝早九點出發
咁就變成冇緣响旭川食旭川ラーメン喇

是但啦,籮神嘅早餐我一樣食得咁開心
同奈良一樣,買籮神一定要買炸雞
加份北海道限定嘅三文治
唔少得嘅當然有北海道日高嘅牛乳啦

旭川 → 稚內
特急サロベツ、261系
同去帯広嗰架同系
只係車身顏色有少少分別咁唔特別影喇~

今程車嘅距離好遠要搭得耐啲
响車度除咗食早餐仲食小食
都係响帯広嗰陣買嘅柳月三六方
同好好食嘅**六花亭 **マルセイバターサンドマルセイキャラメル
六花亭呢兩樣嘢好L好食
一定要再再再入手!!!

仲有KirinGuarana(キリンガラナ)
北海道嘅可樂就係佢!
亦都只係得北海道先有得賣

橫風橫雨,日本最北端稚內(稚內駅)到着
早一班車除咗係有得嚟稚內
仲係早過個颱風嚟到呢度

有一刻咁大把諗:
明知個風會嚟呢樹
係咪應該唔好跟住個風嚟呢到
係咪應該乖乖地留响旭川
然後邊度都唔去
靜靜地响酒店等個風吹走咁

咪黐線啦!
我嘅鉄道旅程好明顯係無懼風雨
打風之嘛呢啲小事
係絕對影響唔到我㗎囉~
哈哈哈哈哈,呢邊啲街無樹㗎
唔行近海邊就唔會俾浪捲走
其實係啲雨打落塊面到痛少少啫
同埋驚吹爛把遮死都唔開
(開咗都肯肯定冇用)
呢個情況下拖行李去酒店係狼狽咗啲嘅
好彩間酒店好近
轉個街口兩分鐘就到

响酒店放低咗行李
就去稚內駅逛吓食吓嘢
@稚內駅キタカラカフェ
日本最北產嘅宗谷牛
食呢種牛嘅burger就啱啱好
隻包有合桃响裡面好香口呀
北海道產嘅薯仔,炸啦炸啦
大人細路都鍾意嘅日式肉醬意粉
唔可以漏咗呢杯北海道限定嘅sapporo classic beer
任何時候諗唔到飲咩都係會有佢嘅出現 

祭完五臟廟
就要做呢啲打風一定要做嘅嘢:去超市買定嘢食
其實就算啲餐廳唔開
响酒店嘅餐館食再唔係返稚內駅食都OK
但唔可以排除到時懶啦
同而家冇嘢做搵啲街行吓嘛

買完返酒店冇幾耐就已經KO呢啲喇…
稚内牛乳アイスクリーム 宗谷の塩
有牛奶味又有宗谷鹽味

仲有老是常出現嘅グリコ アイスの実
堅鍾意呢隻波波粒
今次係濃いぶどう濃いもも
都係未重複過味道嘅

個風好強,仲「♪ 來得快完得快~」
打咗陣就走咗喇得返微雨咋
酒店附近嘅餐廳有啲開返
雖然最想食嘅車屋 源氏最後都係冇開
但酒店對出間なら鮨都有得食たこしゃぶ鍋
落樓食喇又(嘻嘻)
大大片新鮮八爪魚咁就清湯烚
好食囉就係!

可惜只可以食個火鍋嘆樽仔清酒就要走
因為响超市買咗刺身
唔食唔得㗎嘛
宗谷產元貝稚內產魷魚
半額唔買會傷心嘅魚生們

稚内限定 男山 最北航路 特別純米就perfect
點解北海道啲清酒都係易入口都暈㗎呢?

呢少少酒好難醉嘅
咁其實啱啱個電視播緊code blue 3嘅最終回
一路冇睇開加上離食酒店無料消夜有段仔時間
走上樓浸溫泉先(天北の湯

浸完唞返陣就落酒店餐廳食宵夜
夜鳴きそば
即係碗豉油味即食麵(哈)

打完風有啲舖頭開返
就去咗呢次旅程超少去過嘅藥妝店
又行過超級市場
溫泉又浸過喇
酒又飲咗嘢又食過
係仲未有景睇啫
聽朝啦,好好地瞓就會有㗎喇(我深信!)

-----------------------------------------------

延伸閱讀:
Day1:新千歳空港 → 帯広
Day2:帯広 → 釧路
Day3:釧路 → 塘路 → 網走
Day4:網走 → 旭川
Day5:旭川 → 稚內
Day6:稚內 → 札幌
Day7:札幌 ↔ 小樽
Day8:札幌 → 新千歳空港