2018 年 3 月 3 日

[麵] 鐵牛台灣牛肉麵 - 招牌紅燒牛肉麵

啊!好耐冇去過臺灣喇
好掛住啲牛肉麵呀~

每次行經都見到坐滿人
咁啱呢個時間冇乜人
唔駛等位咪試吓囉

間嘢個名有牛肉麵字樣
碗嘢又叫招牌紅燒牛肉麵
唔嗌佢嗌乜啫?

個樣睇落都OK嘅
牛肉令身湯底色深
有酸菜同生菜呀蔥呀嗰啲啦

唔… 湯底只有微香
同食開啱我嘅微辣含花椒口味有落差
呀係呀,呢個湯唔係香濃嗰啲味呀

麵,唔會好腍呀糊爛咁嘅
合格以上啦~

酸菜一直都唔係嘅鍾愛
呢隻都有齊鹹酸微辣嘅味道
為求唔浪費加上唔難食我有食晒嘅

順帶一提,條生菜好新鮮

而牛,係用金錢𦟌 (腱)嘅
感覺係肥瘦啱啱一半
但係因為佢係筋位唔係肥膏
所以會更好咬
不過又因為佢係筋位唔係肥膏
牛味就變得冇咁重少咗份牛嘅香
可惜係同個湯底一樣
冇乜燉煮呀紅燒呀嗰啲香味

成碗嘢唔係話佢唔好食
只係食落係一碗普通牛肉麵
有少少唔太台灣 (紅燒)牛肉麵咁囉

另外叫咗碟小食芝士花枝丸
哎吔食開港式嘅芝士嘢
以為係釀芝士嗰隻
上枱見到只係淋芝士有啲啲失望
(唔關間舖事係我嘅認知障礙啫)
嗱~ 個芝士醬係勁普通貨色
寄望响個酥炸花枝丸身上
佢彈牙嘅,有微量墨魚味嘅
個炸位唔鹽酥係直炸嘅
所以,其實粒嘢係冇乜味
就算有味都可能係俾個芝士醬搶晒

唔係嘅,間舖啲嘢唔係真係好差嘅
好似呢杯黑糖薑母茶咁吖
佢唔係平時啲「薑黑糖」
而係「黑糖薑」嚟㗎
即係唔係嗰啲齋甜冇薑味嗰啲
杯嘢勁濃薑味又唔會好甜
至少唔駛問小二拎杯水溝淡啲貨
呢杯真心好飲,推!

啲人話元朗有間牛肉麵好好食㗎喎
但係要入到去元朗咁貴遠喎
好似都係搭程機去台灣食方便啲
牛~ 肉~ 麵~ 啊!
I miss you so much~~~

-———————————————-

延伸閱讀:
[臺東瘋食遊] Day7:湘琪牛肉麵
[臺北暴食遊] Day3:舊道口牛肉麵
[臺北暴食遊] Day1:老董牛肉麵