2017 年 6 月 16 日

[Happy Days!鹿児島宮崎!] Day 8:すすむ屋茶店、一番街商店街

憤怒嘅感覺中帶著悲傷嘅心情
所以要飲綠茶去冷靜
再食返啲甜嘢去cheer up吓先得

アイスのせ ぜんざい(緑茶付)
雲尼拿雪糕配甜死無命賠嘅紅豆蓉
就算有呢杯香濃帶微苦嘅緑茶
都阻擋唔到隻爆甜紅豆味
杯茶真係好好飲,同今朝嘅知覽茶唔同味
無得比較,兩種都好飲

左下嘅和菓子有綠色嘅よもぎもち
同白色有豆豆嘅塩豆大福
兩隻連餡都唔係好甜
餅皮唔會超厚,夠韌身唔錯呀
草餅嘅味好清新,帶微微草香
而塩豆鹹鹹哋更為滋味
食甜嘢中帶鹹味雖然可以輕輕令個甜無咁滯
可惜同時又會令個甜味更甜
係呀,個甜味又係源自於嗰碗紅豆(無限輪迴)

ぜんざい(緑茶付)
有凍嘅雪糕set
都有傳統日式紅豆湯年糕set
個即席緑茶係一樣嘅,好好飲
碗紅豆湯無因為比紅豆蓉加多啲水而減少個甜度
即係如果飲哂成碗都係即時變成糖尿病患者嘅
但碗嘢裡面夠年糕就超夠韌加上米味香
嗱~ 碗嘢分開嚟講係好食嘅
紅豆味係香不過真係真係好L甜囉

和菓子係わらびもち
佢OK好食嘅,中規中矩嗰隻
無咩特別咁樣

除咗就咁堂食
仲可以揀吓茶返屋企慢慢泡

慢慢聞,揀啱先買~

間舖座落响住宅區
個設計又簡約
有種好平靜嘅感覺

但係入去食到咁上下嘅時候
有幾件香港女人走入嚟坐啦食啦
結果當然又係張一個好安靜嘅日本茶舖
變成港式茶樓咁嘈囉
唔係話我香港人貶低香港人
甚至歧視返佢哋(我知自己都係香港人)
喂呀大姐你哋見周圍嘅人都細細聲講嘢
你哋啲人又只係坐响你哋隔離
真係需要講乜都要成間鋪都聽你哋講乜呀化?
講嘢細聲啲真係唔會有人以為你哋啞㗎囉
失禮到來回地獄又折返人間
快少少嘆埋走喇都係… …

一番街商店街
食完甜嘢要消化吓啲糖分
行吓呢條大正2年(1913年)就有嘅舊街
係有拱形頂設計落狗屎都行得街嗰種
呢度比天文館更清靜
有少量叔叔嬸嬸行吓買吓餸
而遊客就連影都見唔到
但穿過佢再到鹿児島中央就完全唔同光景喇…

-———————————————-

延伸閱讀:Happy Days!鹿児島宮崎! (10D9N)