2019 年 7 月 12 日

[串] モクモクやきとん | Mokumoku Yakiton

諗住睇吓有咩書好,見到《我想吃掉你的胰臟》
(君の膵臓をたべたい by 住野よる)
就變咗搵吓邊度有好食嘅內臟(哈)

坐低未嗌嘢就有前菜冷番茄
好新鮮嘅清甜番茄浸响柚子醋度
絕對係美好嘅開始!

食串燒飲啤酒就最爽~~~
呢度除咗有Suntory ザ・プレミアム・モルツ
仲有甜甜唔會苦嘅Suntory ザ・プレミアム・モルツ〈黒〉黑啤
日本啤最專注佢層綿滑細密嘅泡
所以好多日本啤機都係會有一條出酒一條出泡咁

呢間係食豬串燒,仲有好多係內臟㖭
先嚟串豬喉軟骨串(フエナンコツ)
簡單灑鹽就燒,勁爽脆cop cop cop嘅感覺
仲有啲豬香味好正呢!

豬顎骨肉串(豚のアゴ肉)
啲肉同我塊面一樣咁彈吓彈吓

西班牙產豬肩肉串(スペイン產イベリコ)
イベリコ只係ibérico咋喎,點解唔譯埋個膊頭嘅?
是但啦,至少知佢係咩豬
啲肉好滑好juicy,同平時啲風乾豬又唔同味啊

豬肚串(ミノ)
哈哈咬落個面香脆但係咬咬吓嗰陣及第粥豬肚味出返嚟,好過癮(心)

上等豬脷串(タン)
同牛脷嘅豐厚感唔一樣,豬脷嘅爽脆都係咁令人回味無窮
OK牛又好豬又好鴨都好,係脷就鍾意(嘻嘻)

豬皮串(豚のかわ)
外圍焦焦嘅裡面膠原滿滿好好味~

網油豬腦卷(豚の網脂脳みそ巻き)
簡直係功夫菜!
用豬網油包住豬腦然後串起嚟燒
豬腦新鮮冇臊味,用濃郁嘅醬汁燒過好送酒
油脂唔會太膩而裡面個腦咇漿出嚟嗰嘢正到吖…
呢啲咪就係幸福嘅感覺囉(幸せ~)

食完咁三高嘅扮下嘢都要「清淡吓」嘅麵豉矮瓜
咪又係濃味啲friend哈哈

白金豚肉茗荷卷(白金豚のみょうが巻き)
為日本國內最高等級、身價最高嘅岩手白金豚
隻隻都飲泉水大嘅!
豬味非常濃,脂肪同肉比例超平均
包住茗荷呢種生薑再減低油膩咁
啊!好爽~~~

豬生腸串(コブクロ)
由細食生腸串都係凍嘅同橙色嘅(!)
見到原色有啲唔慣好彩呀輸卵管個樣我細細個已經認得
同橙色嘅一樣勁爽口,食幾多串都唔會厭!

豬腰子串(マメ)
即係腎,比雞腎滑身好多
加埋白胡椒粉調味,香氣更撲鼻

味噌煮 牛筋 (牛すじ)
無法抗拒嘅鹹味啫喱
食咗差唔多五粒鐘黑啤都隊咗五杯,堅係飲飽食醉(謝謝款待)

因為係星期五,串燒一定要兩串兩串咁嗌
原本係想將menu成版每樣都叫一串(淚)
山形煙豬腩、西班牙夾心肉、小腸大腸、豬膶豬心豬耳blablabla
唯有下次先食你哋喇~~~

e?明明話要「吃掉你的胰臟」(豬橫脷)㗎喎

但係個menu度冇… 點先?!