2018 年 5 月 23 日

[hair & body] Disney Princess - Sleeping Beauty Fragrance Mist Castle Rose

向來迪迪尼啲咩美式卡通人物都唔係我嘅菜…

只不過見到佢係玫瑰味又平平地
(100円only但唔係百円店入手貨)
由樽蓋到樽身嘅設計都幾靚
仲係made in Japan爛船都有三斤釘貨色
就算唔係噴頭噴身
買嚟噴衫噴屋噴廁所都值得入手

正所謂一床不能藏二女之下
呢隻sleeping b__chy應該同我唔算好夾
隻玫瑰味俾好似細路泡泡浴冚晒
是但啦,唔用嚟噴自己就OK

講開睡美人,又不如講吓白雪公主
件事係响1937年開始
有住美妙嘅聲線同歌聲嘅演員Adriana Caselotti
以970元美金嘅酬勞幫白雪公主配音
(換算而家嘅幣值大概1萬6千幾美金咁上下)
同迪迪尼簽約中有呢個條款:
「未來唔可以再接演其他電影嘅配音或演出。」
(包括電台節目同其他會出到佢把聲嘅一齊演出)
原因係迪迪尼唔希望大家對白雪公主嘅幻想破滅
所以就算當年首映嗰陣
Adriana Caselotti係並冇受邀出席
連個名都冇出現响片尾字幕
迪迪尼因為呢套片賺到嘅肥仔就係人都知
而收完呢一千蚊都唔夠嘅Adriana Caselotti
後續嘅演出生涯都完結
係呀唔出得聲就係連演員都冇得撈喇
無計啦冇名氣冇財富底下
唯有疊埋心水嫁人囉
之後嫁過四次都冇好似啲童話咁happy ever after
唔係死老公就離婚咁啦
然而迪迪尼靠呢個角色賺唔少
但始終都無俾返個credit俾Adriana Caselotti
直到好多好多年先俾人踢爆
可惜佢直到晚年都冇得參與重要角色嘅演出
最後1997年就瓜柴,享年80歲

係㗎喇,呢個世界就係好多人會過橋抽板
只會自己收晒公眾賦予嘅光環
一直退居幕後但不斷推你上位嗰啲?
「我有晒足夠嘅曝光率啦
唔再需要你、係一腳踢走你㗎喇
人哋又唔識你,你覺得啲人會信邊個?」
要迫人走嘅同時仲要加鹽加醋去誣衊佢
仲會同周圍嘅人講:
「李白佢呀有暴力傾向,我而家好驚呀都驚佢嚇親其他人!」
係呀,詩仙李白啊唔係筋肉人
擺明係文人都會咁俾人屈㗎
點解可以咁俾人屈?
因為啲人唔識退居廬山嘅李白
都唔出面所以冇人識佢
之前默默耕耘嘅努力
包括所有時間金錢技術創意
統統因為單單地唔係幕前嘅人而付諸流水
小橋流水人渣再俾人中傷
注資時做嘢嗰陣係拍檔
推到你紅咗就一腳伸開踢走人
講錢嗰陣就話「朋友冇咁計」
係唔俾你反正同任何人講都冇人知你係邊個
無人會信你曾經做過嘅嘢
吖~ 直頭講你一直唔做嘢同只係做錯嘢
都係嗰句重複到有啲口臭喇:
啲人根本唔識你,只係識我咋
我講乜啲人都會信冇人會信你㗎
果然,朋友係要嚟利用兄弟係要嚟出賣
過橋抽板嘅「朋友」
並唔係每個人都鍾意俾人搵笨
人情債先係呢個世界上最難還嘅債務
有時啲嘢人在做天在看(好老土囉呢句)
踏住人哋嘅頭顱爬高
滿手鮮血再加微微銅臭味嘅人
記得務必小心唔好俾滿地鮮血跣親啊
個光環跌落嚟揩到啲血整污糟晒有排抹就唔好啦

(歡迎對號入座,如有雷同實屬李白嘅不幸。)

我呀嘛… 繼續玫瑰細路泡泡浴味周圍噴
雖然支嘢無酒精但係都唔會點火嘅
天氣已經咁鬼熱,唔點火都已經好L㷫
夏天呀你快啲過主啦啦啦~