All Posts
又係啲邊睇邊嬲到震嘅Documentary
사이버 지옥: n번방을 무너뜨려라》
（Cyber Hell: Exposing an Internet Horror | 網絡煉獄：揭發 N 號房）
件事發生响2018下半年至2020年3月南韓嘅性剝削案件
利用Telegram建立多個room
將威脅女性得嚟嘅個人資料、相呀片呀發佈同直播 受害人會被要求在身體上刻字、食屎飲尿、
將蟲放入性器官，同侵犯自己幼年親屬等等
亦有部份受害者會响offline時被性侵
仲會响呢啲事件中錄影上載甚至直播
最細嘅受害者只係得11歲，讀！緊！小！學！
賴吖賴吖賴吖～
唔認係自己衰咪畀人去踢爆你有幾衰囉！
Downfall: The Case Against Boeing
又係Documentary喇
由一而再再而三嘅空難開始
先係波音「調查」後係話機司嘅問題 然後就揭吓揭吓
原來係將啲機改改吓又唔通知航空公司
更莫論係要叫機司學新嘢
再講吓講吓講到一間安全至上嘅公司
點樣因為收購上市
搞到為錢就求其整啲嘢掉上去個天度飛
望望吓都覺得利益行先罔顧人命咁
睇到嬲！（怒）
利用愛情友情（或許加少少貪婪）就去呃人一大筆錢
呢啲人放上全球螢幕去鞭屍警戒世人就啱！
The Tinder Swindler
係套拍得唔悶嘅Documentary
犯罪嗰隻，唔係鴦氏嗰種拍攝手法（嘿）
講返條詐騙路線timeline 同埋來自以色列嘅猶太裔騙子Simon Leviev
點樣利用Tinder識人
去呃呃騙騙令到啲女人嘔咗有排先還得起嘅卡數
純（？）求財去「支援」超級發揮嘅生活
慣犯嚟嘅，捉過坐過監㗎喇
返出嚟又再火鳳凰
反正拉咗都係坐一陣 or 根本入唔到罪
不過啲受害者就冇咁好彩
錢，有排還而且仲對人失去信任
（雖然都仲有唔識死嘅）
一路跟住個詐騙犯嘅虛擬人生 滿足好奇心之餘都可以反省吓網上見到啲人post嘅嘢
演員好睇；劇本節奏輕快而緊湊
都係真係好好睇呢～
Don’t Look Up
電影嘅開頭10分鐘已經講講好晒危機帶入戲
然後當然係身為科學家同助手嘅主角
（哇哇哇係Leonardo Dicaprio同Jennifer Lawrence）
諗諗用咩方法去拯救地球
不過梗係冇咁易啦
政客甚至係總統（Meryl Streep）
為求自己眼前嘅嘢擺到明唔見棺材唔流眼淚
衾得就衾總之唔好引起恐慌
喔！就係死到臨頭地球毀滅都 I don’t care嗰隻
再加啲daily八卦節目主持人
對娛樂圈是非外星人比舊彗星衝落地球人類GG更有興致
最正仲有商人就係權力核心
有睇開動畫，見上劇場版咪入場睇囉…
劇場版「鬼滅の刃」無限列車編
動畫同劇場版都係跟漫畫個劇情
但係畫風嚟講動畫係無得輸嘅
故事簡單節奏明快
所以造就成男男女女大大細細都啱睇易入口咁
講返劇場版，因為情節一貫地快
見唔到究竟柱嘅實力有幾勁
只係覺得個火車便當係好好食
又冇乜交代到啲細嘅同柱之間嘅深厚情誼結
講真，大家識咗一程車都冇嘅時間
就算瓜柴都真係唔駛喊得揪心嘛
套嘢係唔錯嘅，係由電視螢幕變咗電影螢幕
不過都真係好似睇緊電視咁
（動畫版我响電腦睇嘅）
咁話到啲人睇到喊晒咁呀
可能係因為要課金入場睇所以喊咗啩…
好耐無試過有套日本片可以由偷笑到尾，哈哈哈
漫畫改編真人版電影
套戲講親情嘢
橋段老土不過劇情爆笑
仲好大卡士，睇客串都夠目不暇給！
好耐無笑得咁爽喇，DEATH～
預L咗好笑；只係估唔到要等咁耐先有得笑！
ヲタクに恋は難しい
又係漫畫改篇 x 山﨑賢人喇哈哈
响等得太耐嘅期間
已經睇完動畫，覺得個故事都幾好笑
加上係福田雄一監製
而佢嘅品質嚟講就算全劇透都唔會唔好睇
高畑充希主角好稱職
加上係歌劇串連邊種搵佢唱歌真係啱晒
（上次睇佢响《引っ越し大名！》演 + 唱已經覺得佢幾勁）
演桃瀬都同動畫嘅好似
一路好想睇cosplay嘅菜々緒
無失望嘅只係喔改變咗得返勁少出場
反而賀来賢人同今田美桜仲多過佢
OK… 福田雄一超鍾意賀来賢人（我麻麻）
故事流暢，要有嘅搞笑位都做足
演員們本身都好戲
啲cosplay衫又夠靚
完全係少女心爆發嘅一套戲
（心心心心心，五個心）
明明唔鍾意睇愛情片
但係無計啦片寄涼太加橋本環奈呢個無敵靚嘅組合
仲係夢幻到癲嘅少女漫改編
（みきもと凜嘅同名漫画，連載中）
兩條友都係撕漫樣再加sweet到糖尿病嘅劇情
差唔多兩粒鐘嘅戲
故事流暢無悶場無拖拉
又有一氣呵成完美結局好滿意
仲有，遠藤憲一好搶鏡（哈）
畫龍點睛不失美感啦
話說等睇呢套戲好耐㗎喇
好彩套戲比預想更好睇呵呵呵
講開大話嘅國會議員
因為有次意外令佢只可以講真話
咪就係爆笑囉！
可惜呢啲誠實嘅議員只係電影先出現到㗎咋（哈哈）
⇈ 講呢句真係安全㗎可？
今日係6月閏30號
全港只有Cinema City Victoria上映呢套戲
所以，唯有落一轉 銅！鑼！灣！ 啦～
愛情片一向都唔係我杯茶
但係呢套又幾好睇咁喎…
一對黃昏戀
由相識到開房再火花式熱戀然後分開又有啲唔捨得
因為長情又迂腐嘅主角唔想拋低老婆啊！
（另一個就單親帶大個對天父好好但對生父好衰嘅耶撚仔） 兩個都未出櫃；亦唔打算出
然而感情唔太深就唔需要有咩掙扎
幾貼地嘅愛情小品
無唯美嘅鏡頭
更覺得淡淡嘅哀愁貼近現實
故事流暢，幾好睇喎又
多謝肥fat嘅飛～
有一日，响巴黎社區嘅一則小日常 三個巡警：一個第一日跟隊嘅差佬
跟著個警察 - 大L晒唔理三七廿一
恃住「差人做嘢」嘅名義
非禮啦按程序搜捕甚至妨礙司法公正仲會毀滅證據刑事毀壞進行私了咩都做得出咁
另一個就以「壓力大」為名
會手執武器嘅開槍對付細路
好啦，個細路都係其身不正嗰隻
偷嘢搞搞震童黨派系
不過唔代表佢唔能夠得到合適治療同公平審訊
套片大部分時間係由唔同角色嘅生活切入
睇落係平淡嘅每個細節
都會係形成中段嘅衝突位
加埋最後唔知點收科嘅困獸鬥
啊啊吓～ 都係鬥大鬥多人鬥軍火強勁
驚畀獅子咬咪嚇到瀨尿囉
驚畀人打死咪一直求饒囉
成個故事都冇絕對無辜嘅人，好寫實
都幾好睇，值得推薦！ 戲院啲凳，兩個兩個拉起晒封鎖線咁…
睇睇吓日本電影
突然想睇套韓國電影…
二選一，就捨棄咗《上流寄生族》
睇呢齣《82年生的金智英》
講一個好平凡嘅韓國女人
走咗一條就算幾唔願意都要走嘅「正常」結婚生仔辭職湊仔嘅路
然後精神出現咗問題要去睇醫生
之後有睇返本原著小說
小說大部份同係一樣
不過結局更黑暗同時更寫實
難怪堆韓國男人咁抗拒同恐懼呢套戲
因為畢竟將佢哋嘅潛規則揭出嚟嘛
話說男女主角係第三次合作
有睇《도가니》（熔爐/無聲吶喊） ← 極推薦
冇睇《부산행》（釜山行/屍殺列車） ← 唔啱睇冇計
劇本大於演員誘因
然而兩位演員好好戲好入戲係事實啊！
