All Posts

Netflix:인간수업 (人文教育 101)

因為情節太緊湊 就一次過用兩日煲晒佢 絕對係超!熱!血!青春校園劇(微笑) 雖然係圍繞兩位頭腦好使好用嘅高材生男女(加個唔叻叻嘅援交同學) 不過絕對唔係《輝夜姬想讓人告白》嗰種啦~ 有援交有類N號房直播有網上媽媽生(男主)有黑社會有欺凌有爆血形打鬥blablabla… 情節唔複雜議題唔過時最重要係冇一刻拖劇時間 好好睇喎!好難唔推薦呢~

NHK:いいね!光源氏くん(真好啊光源氏)

雖然呢套劇係同名漫畫改編 但係我冇睇返本漫畫 反而係睇晒嗰本世界最古早嘅長篇小說:《源氏物語》 套劇係講光源氏流放去須磨(12帖,源氏26歳春-27歳春時期) 但係就穿越咗嚟現代 白食白住唔駛做有女養 幾集後頭中将都過咗嚟仲做埋男公關哈哈 平安時代係個「物哀」(物の哀れ)嘅審美理念 講人話就係咩都感慨吓郁啲意都喊咁啦 而貴族嘛梗係做咩都節奏慢 咁同家陣嘅急速模式當然有好大嘅分別 加埋古人諗到乜都會即席都唱歌吟詩 (唔信咪可參考李白杜甫白居易,唔係佢哋以前求其噏幾句我駛鬼背咁L多嘢) 所以,套劇其實幾好笑 例如平安時代尼姑唔係剃光頭而係剪短髮 光源氏就以為女主係尼姑 女主嫁唔出,光源氏同頭中将問咁你阿爸係咩出身咩職位 又問及識唔識琴棋書畫以明白點解會無人要咁 but千葉雄大啲牙有啲難睇搞到成日出戲 伊藤沙莉,即係以前《女王的教室》嗰個唱K女仔 個樣無變過好易認,係把聲成日都好似喉嚨痛咁幾搞笑 得八集,每集唔駛半粒鐘 輕輕鬆鬆咁咪幾好…

MBS:ピーナッツバターサンドウィッチ (PBS)

以婚活漫畫嚟改編嘅日劇 一集未到半粒鐘劇情幾輕鬆 仲得嗰八集之嘛,唔難睇得晒啦! PBS stands for Peanut Butter Sandwich 冇咩意思,只係職員話齋「求其改個名咪改自己鍾意食嘅花生醬三文治」咁囉 一來有伊藤健太郎 二來故事主要講啲以結婚為目標 覺得一睇無妨啊 下面四個係「調查對象」 一個職場好叻所以要搵所謂「普通人」對象其實條線set到好高 一個七年之癢 一個細個好窮因此想要好有錢嘅但係實際上係唔需要 一個直頭係人渣攝石個個搵佢做SP佢又肯喎 仲有第五調查對象嘅,不過唔劇透(嘻) 冇咩嘅,自己覺得幸福咪得囉… ps, Niki好靚,但係疫症期間唔好唔戴口罩仲周圍去玩啦~

関西テレビ:そして、ユリコは一人になった

哈!估唔到會睇晒… 改編自貴戸湊太獲得『このミステリーがすごい!』 大賞嘅同名小說:《然後 yuriko就獨自一人了》 講述一個關於「ユリコ様伝説」嘅黯黑系青春校園故事 劇情嘅推進唔錯,完整嘅故事 臨到最後嘅少少反轉有驚喜 八集裡面七集劇情第八集做分析都唔會覺畫出腸 點睇都係覺得做主角嘅玉城ティナ個樣太恐怖 如果只係佢我係唔會開劇睇 (搞到套有伊藤健太郎嘅《惡の華》都唔敢睇) 係見到同主角暴光率一樣高仲係叫百合子嘅岡本夏美先有啲興趣 再見到個樣有啲似黒木華飾演筒見友里子嘅天野はな 就認為一睇無妨 點知最後變成追劇睇哈哈 有時間或者會睇返原著小說 但係近期拜讀緊《源氏物語》 應該有排先可以開新書睇…

朝日放送テレビ:この男は人生最大の過ちです

同樣係漫畫改編日劇 比起近期好多人睇S系佐藤健嘅《恋はつづくよどこまでも》 都係M系又鬼咁型 x 好樣嘅速水もこみち啱睇啲 完美嘅M型社長配發火便成抖S嘅職員仔 每集半粒鐘好輕鬆又夠搞笑 之前未認識松井愛莉就唔明點解揀呢個人 不過睇劇嗰陣就發現佢身長腳長一米七 著埋高踭鞋配速水個一米八六嘅高度係啱啱好啊 冇睇過本漫畫不過齋睇人設覺得都幾似咁(名取蒼除外) 笑吓咪幾好,反正留响屋企時間多咗可以睇到啲戲呀劇呀動漫kill吓time… 至於佐藤健嘛… 等睇剣心最終章咋~

中視:想見你 (Someday or One Day)

「許光漢是我的」 因為睇過太多臺灣妹子寫呢句 所以就會一會佢睇吓有咩咁特別 然後,完成咗人生中第一套臺灣劇仲要係偶像(?)劇 話說以前嘅咩流星花園MVP情人惡作劇之吻花樣少年少女我在墾丁天氣晴命中注定我愛你敗犬女王海派甜心我可能不會愛你必娶女人荼蘼通靈少女blablabla全部都係有聽過冇興趣因而無睇過 有諗過因為劉以豪去睇《我們不能是朋友》但真係頂唔順呢啲劇情而放棄 有睇過一兩集《你的孩子不是你的孩子》不過冇睇晒嘅衝動 都有諗過睇《我們與惡的距離》可惜太沉重都係唔想開頭 講返點解睇晒先:故事完整流暢夠張力唔拖劇唔矯情 愛情友情親情穿越查案再帶啲中二同搞笑(十三妹!) 演員表情恰到好處,唔同時空嘅轉換唔突兀 加上剪接做得好唔會睇起上嚟唔識分時空交錯 但最終,我沒有喜歡上許光漢 卻不會否認他演這個角色演得非常好 一口氣睇完13集連彩蛋有啲攰(一集成粒鐘呀大佬) 冇咩我都係去睇返動畫好喇…

TBS:グランメゾン東京 (Grand Maison Tokyo)

有木村拓哉嘅戲就係好睇囉! 劇情係老掉了牙嘅走向啦: 之前身敗名裂過嘅廚師遇上滿腔熱誠想摘星嘅大媽廚師 一齊去努力奮鬥blablabla… 當中梗係每集一難題又哎吔可以解決得到嗰種啦,好熱血嗰種啦 但係木村真係演乜似乜 至少啲法文應該請教過呀Kōki啩聽落都算順耳 嗱~ 除咗睇人當然會因為有好多嘢食睇啦 而且配得木村,個個演員都係重份量 鈴木京香澤村一樹及川光博(表情100分)個個都做得好自然 (啊原來老是常出現嘅玉森裕太被排除) 哈哈哈搵富永愛做木村嘅ex感覺好新奇… 唔錯嘅秋季日劇吖!

TBS:わたし、定時で帰ります。

我不嬲都準時收工嘅 所以咪可以有多啲時間做自己鍾意做嘅事 包括… 睇日劇! 都係由漫畫改編嘅電視劇 講一個之前工作過勞而暈倒之後就講明唔加班嘅女主角東山結衣(吉高由里子飾演) 佢身邊啲同事同伴侶屋企人嘅事 劇情嘛… 就係十集裡面一集一位配角嘅單元 呢集講完佢下一集就變返大配角咁 OK嘅好似比就咁睇個冇乜表情嘅吉高由里子好少少 之但係有向井理向井理向井理啊!!!(好重要嘅講三次mode) 呢條主線預咗會有好結局而真係有好結局太好喇實在拍手掌 咁其實套嘢又唔悶 幾好睇吖都係會推薦吓(向井理向井理向井理!)

TX:きのう何食べた?

哎吔吔,12集咁快就做完… 由漫畫改編嘅同志日常小品故事 勁靚仔嘅西島秀俊飾演筧史朗 同表情連小動作都超神似 唔講係直男真係以為本身came到入血 飾演美容師矢吹賢二嘅内野聖陽一齊住埋嘅點滴 套嘢叫『擒日食乜餸』梗係集集都有飯食 有嘢食有仔(佬啦)睇劇情有夠寫實有時搞笑仲有時幾sweet 冇睇過套漫畫但聽講都拍得好忠於原著 (爸爸嘅角色後尾兩集因病換咗人) 死啦~ 已經有啲失落㖭(扁嘴)

NTV:3年A組-今から皆さんは、人質です-

終於校園唔係只係得純愛青春奮鬥劇~ 畢業禮前十日美術課老師炸Q咗離開班房嘅路 為求幫班人渣學生上最後一課 熱血嘅老師用最瘋狂嘅方法令學生長大、面對真相 同埋學識要為自己嘅言論與及所作所為負責 畢竟高中生轉眼就已經係成年人 唔可以再好似小朋友咁㗎喇 有老師有學生有刑警 個故事節奏明快 雖然結局都預咗係喊晒口人生大哲理嗰啲 但係無損成套劇嘅張力呀 加上去班房裡面有片寄涼太、古川毅、鈴木仁喎 (已經未計新八阿SIR喇) 如果當年同班嘅有咁高質真係日日返學都願啊~

MBC:Infinite Challenge 무한도전 - 토토가3 H.O.T.

哇哇哇!等咗17年終於等到佢哋一齊上台喇(感動) 好耐冇試過咁期待一套嘢播出~~~ 白色氣球海呀!!! 雖然冇得親身去現場睇 (一星期內17萬人申請,場館容納二千四人,冇可能抽得中。抽中都唔識聽個確認電話。聽得明仲要買機票酒店等等…) 睇節目同啲人放嘅現場片都好吖~ 青蔥歲月呀…… 延伸閱讀: [Kpop] 我最喜歡H.O.T.的五首歌

NHK:第67回NHK紅白歌合戦

好耐無試過又捕住個「電視」 今次唔係睇劇,係跨年唔出街睇紅白!!! (睇完出街倒數其實都OK,一陣睇吓點先啦~) 雖然今年終於無咗SMAP (Mmm… 從來都唔覺得佢哋唱歌好聽) 但係仲有好多想睇(聽)嘅嘢 好難得,因為感覺上已經無興趣咗好多年 突然間又有返D嘢好吸引所以又追返咁… ~望一望有咩好睇~ 放送日時:2016å¹´12月31日 午後7時15分から11時45分 場所:日本東京NHK音樂廳(我當然係响香港上網睇啦!) 総合司会:武田真一 司会者:(赤組)有村架純 司会者:(白組)相葉雅紀 審查員(共10人) 秋本治/新垣結衣/伊調馨/大谷翔平/草刈正雄/春風亭昇太/高畑充希/辻沙繪/萩野公介/村田沙耶香 (最重要嘅)曲目: 你睇你睇,有細細個就鍾意嘅Puffy啦 X JAPAN喎 紅喎 福山雅治啦,娶咗老婆細路都生埋又點?都係靚仔唱歌又好聽。 ゆず D歌都好好聽好順耳啦