2020 年 1 月 14 日

[ドキドキ鳥取] Day2:米子 ↔ 境港(四六時中、大漁市場なかうら、回転すし大漁丸 境港店、三代目網元 魚鮮水産 米子駅前店)

話說酒店嘅welcome drink係自己响雪櫃度揀
擒日冇飲今朝又渴渴哋就睇吓有咩好飲

鳥取産 二十世紀梨 チューハイ
4%酒精啫朝早空肚飲都OK
個梨味好清新,甜甜哋咁又幾好飲喎~

因為星期二境港魚市 (境港さかなセンター)冇開
諗唔到做咩咪望吓地圖有咩好去,不過都係去醫肚先…

四六時中 - プレミアム花籠**(季節の天ぷらと蟹海鮮丼花籠)**
見到店頭企牌有呢個一千円花籠
諗都唔再諗就走入去食
成籠嘢都好好食,仲有時令嘅蟹肉啊!

坐餐廳當然會撳撳手機
發現原來自己想去嘅係大漁市場なかうら
而唔係境港さかなセンター(哈哈)
因為兩度都係响境港市嘅竹内団地所以睇錯
好啦,慢慢食飽飽去搭JR出發啦 yeah

遠遠望到大山

今程係搭ねこ娘列車

紅色車身有住大大隻鬼太郎、爸爸同貓女

當然車廂裡面都有啦

抬頭响天花都係大大隻

唔少得凳上面㗎啦

高松町駅/「すねこすり」駅
未變身時候圓碌碌好得意
變咗做厄運のすねこすり就惡惡咁喇~

同爸爸say byebye先

荒蕪嘅高松町駅

能相信嘅只有google map

沿路係全露天
好在天氣都OK唔會曬

行咗十幾分鐘終於行到竹内団地
好~~~大~~~間~~超級市場SUPER CENTER PLANT-5 境港店

大漁市場なかうら
到喇到喇超興奮

門口有隻超巨型嘅鬼太郎同爸爸
左手攬住隻松葉蟹
個石像成7.7米高㗎!!!(約90噸重)

市場裡面有水木先生嘅手稿

同一般濕笠笠魚市場唔同
呢度係手信館咁啦
(所以先睇錯咗真正魚市場嘅境港さかなセンター)

然而同樣都有活松葉蟹賣
哇哇哇仲有五輝星呢~

嚟得境港呢個松葉蟹重鎮冇理由唔睇排排蟹
好想買但係冇時間食只好放棄啊…

而普通紅楚蟹個價格就低好多
兩種蟹食落唔同味肉質都唔同啦

冇嘢啱買行出個市場
未肚餓就行吓大大間百円店Seria

行出嚟先見到呢架百円境港巴士はまるーぷバス(!)
係可愛嘅日野・ポンチョ車款(心)

雖然一日得九班,經呢度只係得八班
但至少夜啲唔駛沿住荒蕪嘅路出返去車站

一陣見喇山田先生~

然而seria實在太好行
行到錯過咗返去對面街大漁市場なかうら隔離間御食事処弓ヶ浜食飯 T-T
(營業時間1045-1530,我1600先去…)
googbyeかにトロ丼同隻七千円原隻松葉蟹
兩邊對面街都有迴轉壽司すし若 竹内団地2号店同回転すし大漁丸 境港店之間
揀咗回転すし大漁丸 境港店
先飲返杯呢度出嘅生酒

紅ずわい棒肉
在地境港產紅楚蟹
睇落麻麻食落都OK嘅

石鯛… 個油花靚到癲

紅ずわい軍艦
哎吔,紅楚蟹係OK嘅不過唔夠驚艷啦

點樣都唔夠ずわい棒ポーシャオン咁正呵呵呵

啖啖肉啖啖肉嘅本つめ

有好多蝦揀堅係眼花繚亂
仲响蟹季嘅時間揀蝦
要蝦精捨棄一堆蝦確實有啲苦惱
揀咗呢隻車えび,爽口味漿香蝦味無揀錯

境港除咗捉蟹仲有吞拿魚
但係舊大トロ真係非!常!大!舊!!!
飯量係standard,舊腩係佢嘅四倍仲勁厚切囉chisin

我愛蟹膏,呢碟かにみそ絕對走唔甩
最多今次飽唔食海膽囉(反正呢度唔係產海膽嘅地方)

食到一檯碟,夠飽喇~

食完再係咁意行吓PLANT-5
(裡面有另一間百円店仔Can☆Do)
差唔多時間就出返站等車

車廂裡面都係滿滿山田先生好得意
(プラント境港店前 → 米子鬼太郎空港

米子鬼太郎空港已經係最近嘅車站

但因為下一班JR實在太耐
唯有「忍痛」搭貴啲嘅巴士(空港 → 米子駅
仲係普通區間巴士冇鬼太郎車身… 淌血中
然而搭完程巴士返到米子駅根據個JR時間表睇
先啱啱會有車經過空港駅,都算慳咗唔少時間嘅

返到米子駅見到花迴廊嘅巴士
雖則呢個花迴廊係全日本最大不過對花冇咩極大興趣

又係搵食時間,响大街行咗一round之後揀呢間三代目網元 魚鮮水産 米子駅前店

白ねぎの天ぷら
米子呢度產嘅大蔥唔係唔食呀嘛?
好好食唔臭青味㗎!

しじみの酒蒸し
激濃香甜鮮味嘅在地產細蜆仔
加埋當地濃郁加熱完都揮發唔去嘅地酒
無唔好食嘅道理囉OK?!

隔離島根縣產牛嘅まつなが牛すき焼き
松永牛嘅味同擒晚大山牛嘅味都幾唔同喎

鍾意食長芋,試吓呢隻山陰產新品種ねばりっこ
黏黏咁滑滑身食得狼狽卻好過癮

晏晝食唔到松葉蟹唔緊要
松葉ガニ 1杯 焼き
唔係非常大隻,以居酒屋嘅咩都食食食嘅話
呢個size都唔錯吖~

初恋レモンサワー
「初戀呀 我要初戀呀」
哈哈哈又幾好飲喎

食飽飽就捧住個肚漫步返酒店

個樣一啲都唔靚嘅米子駅
左邊蚌殼樣係米っ子合掌像

然而呢度係山陰鉄道発祥之地(@1902年 明治35年)
展示咗C57型蒸汽火車車轆啊!

諗住閒逛吓車站
忽然醒起未拎JR Pass
可惜綠色窗口已經closed
即係聽朝要早少少check out落樓搞哈哈哈

咁好啦,响七仔兜個圈買條雪條返酒店吔
超!好!食!嘅 SEVEN & i Premium チーズスティック
非常好味絕對強烈推介!!!

梳洗埋都十二點,好去瞓喇…

-----------------------------------------------

延伸閱讀:
Day1:米子鬼太郎空港 → 米子
Day2:米子 ↔ 境港
Day3.1:米子 → 由良
Day3.2:由良 → 倉吉 → 三朝温泉
Day4.1:三朝温泉 → 倉吉
Day4.2:倉吉 → 鳥取
Day5:鳥取
Day6.1:鳥取 → 境港
Day6.2:境港
Day7:境港 → 皆生
Day8:皆生 → 日吉津 → 米子鬼太郎空港