2020 年 4 月 4 日

[小島怡情] 鹽田仔 | 鹽田梓

懶人hea島,去鹽田仔就最好

响西貢碼頭搭街渡,好方便㗎

有就咁買飛同加埋參觀鹽田+文物室揀
反正去得睇鹽田梗係join埋tour啦
驗明正身,唔好搣甩張貼紙就OK喇

買飛仲連埋張map同簡介
比用Google Map更詳細

十幾分鐘船程,吹吓海風好快就到

入村喇~

厚雲唔太曬都算唔錯

唔搭船可以自己爬艇
不過如果已經咁夠運動量嘅話
仲有冇氣力再响度輕鬆行山
然後再爬返隻艇返去呢?

海邊地方當然會曬鹹魚

鹽田繪 - 樟樹 Camphor Tree
鹽田仔係客家 x 天主教嘅村落
係香港絕少見到「冇天后廟得教堂」嘅島嶼
而天主教其中一樣特色就係彩繪玻璃窗
呢度都有,仲係客家風情話嗰種

鹽田,晏啲先落嚟睇你

食柴火土窯雞嘅餐廳冇開呀
得返貓貓响枱面瞓覺

荒廢加上山竹嘅蹂躪
建築物都呈現住頹廢嘅感覺

成個島得村上唯二居民間屋有人氣㗎咋

澄波學校
建於1846年,辦學至1997年
(有貼紙就可以直接入去參觀)

其中一個校舍改建為鹽田梓村文物陳列室

展品分為農業、工業、日常生活同課室四個部分

話新唔新話舊又講唔上好舊咁啦

鹽田梓聖若瑟小堂 | St. Joseph’s Chapel
响澄波學校隔離,係鹽田梓嘅地標

由奧地利聖言會會士聖福若瑟 (St. Josef Freinademetz)嚟傳教嗰陣興建
1840年祝聖,再响1948年、1962年同2004年進行過修復工程

响2005/6年獲聯合國教科文組織(亞太地區)文化遺產保護獎
而古物古蹟辦事處都將佢評為三級歷史建築

天主教堂一定有嘅鐘
不過眼看手勿動唔好手多多去敲響佢喎!

玫瑰窗
耶穌同神父搭晒膊頭好似元朗的popo同白衫人咁好friend咁喎

响教堂有副紅色嘅對聯你見過未?
我見過,我真係見過!
頂頭寫住「大主保聖若瑟為我等祈」
上聯「鹽光光照主愛滿桑梓」
下聯「田頌頌恩聖寵教友村」
唓~ 唔押韻嘅…

好簡約既彩色玻璃

鄉誼茶座 Leisure Kiosk
冇得食雞就食吓客家茶粿啦
有六種口味揀喎…

…當然係揀晒六種啦!
六隻味為班蘭、眉豆、雞屎藤、蕃薯、南瓜、艾草

個皮厚厚都幾夠韌
餡料滿滿咁,花生唔會太碎好好咬
味道唔會太甜,鹹嘅甜嘅都唔錯

望住個綠悠悠嘅景慢慢嘆吓先

百年老樟樹
响客家人嘅習俗中,如果生咗個女
阿爸阿媽就會種棵樟樹
等佢大個咗就劈樹整個樟木櫃嚟做嫁妝
呢棵樟樹就係嗰陣種落嘅
冇劈落嚟唔知係咪條女嫁唔出啦

又話說當年日本侵華嗰陣
啲日話軍要斬咗棵樹,咁當時嘅村長為咗保護棵樟樹
就同日軍講要斬咗棵樟樹就斬咗佢先啦!
結果,棵樹到依家仲响度而村長嘛…(唔知喎)

向上山方向進發

鹽田繪 - 葬禮 Funeral Ceremony
又見到彩繪玻璃

陳志明副主教祖屋

裡面個石像唔係陳志明
係聖若瑟神父嚟嘅

天主教人家屋企有十字架is a MUST啦

唔好問睇聖經會幾有趣…

吽到野生菇都咁大朵喇(誤)

鹽田繪 - 主保瞻禮 Feast of St.Joseph
响祖屋入面嘅窗

繼續向山上方向

活泉井
直到1960年前,全島居民都剩係靠呢口活泉井嚟飲水

而呢口井亦係香港最後一個供水井

行呀行

上山中

圓頂涼亭

穿過無敵山墳景
就上到高地嘅呢個圓頂涼亭
望住滘西洲對開海面

周圍的植物都快高長大咁
其實都擋咗唔少景

沿住山路又再行

方頂涼亭

唔同角度嘅滘西洲、鹽田仔避風塘嘅景

呢個山頭路短唔高好易行
就咁兜一個圈唔會辛苦

望返鹽田梓村

上完高地就向下行

啲草叢堅茂盛
記住要好好防蚊喎

連接滘西洲嘅玉帶橋

水面平靜

呢度冇遮冇擋,好彩唔曬啫…

對闖入高爾夫球場呢啲行徑冇興趣
回程返鹽田仔嗰邊先

上返少少山

紅樹林

有彈塗魚朝潮蟹嗰啲㗎

只係影到朝潮蟹咋
啲彈塗魚彈彈彈得好快影唔切睇過哈哈哈就算
不過之後見到一大堆密集式嘅蟹仔走來走去
個場景有啲恐怖睇到起雞皮呢…

咁就兜完一圈,返去鹽田嗰邊喇

等睇鹽田導賞,職員先將塊地放水(入)

鹽田仔嘅鹽冇得買嚟食
要買可以買呢啲嚟觀賞用

未開場,坐低等陣

放好水,導賞團都開始
先講解點引海水入嚟

再由一個「田」放水去另一個「田」

見啲水又一邊湧去另一邊
流流吓咁都幾治癒

天然生曬呢家嘢每個工序日日都可以做
好似今日唔係大太陽就唔可以放過濾幾輪嘅濃海水繼續曬

以前嘅鹽田好大,而家得返示範作
然而仲有得睇返曾經嘅生活都係個幾好嘅體驗

曬到最後開始見到啲嘢

微微嘅結晶品

鹽,都有分唔同層次

made in Hong Kong嘅鹽啊!
試食ed,鹹中帶微微嘅甜味after taste

一大罌鹽,人手做全部都係心血結晶呢

完咗tour,望住村長間屋入返村

小島大廚 | Chef de Yim Tin

食tea

村上唯二居民夫婦開設嘅餐廳

辣沙甸魚法式多士

辣魚罐頭即叫即開全部擺晒上去夠豪氣
味道夠哂辣蘿蔔同烘好熱辣辣嘅多士都非常脆

茄蛋治

先講啲沙律菜,啲菜係來自自家農田
除咗有機仲係即摘即製,梗係特別新鮮!

個蛋治簡單又好味
用靚材料動人心整係唔同啲嘅

等到原本坐外面向海位嘅客人埋單
就從鋪頭裡面走出嚟嘆吓海風

反正未有回程船唔趕時間
慢慢坐睇吓山山水水咁咪幾好

Corona Extra
冇virus嘅墨西哥啤酒
個特色係配埋青檸一齊飲(心)

餐廳响碼頭隔離
見到船先施施然行過去都未遲

等夠鐘就上船走人返西貢碼頭
chill足幾粒鐘都咪話唔爽!